Հավատս...

Հավատս... երբեք
Իրար չենք լքել
Ես ու հավատս,
Ու չենք լքելու
Ինչ էլ որ լինի,
Մինչև վախճանս,
Վերջս, ավարտս։
Հավատս լույսի
Խորհուրդն է եղել,
Ճշմարտի, բարու,
Լավի խորհուրդը,
Ինձ վրա բացված
Կապույտն է եղել,
Իմ հողը, հացը,
Իմ ժողովուրդը:
Ամեն տեղ նույնն է
Եղել հավատս,
Իմ արյան գույնն է
Եղել հավատս,
Քո գույնն է եղել,
Փրկության դրոշ,
Դու իմ զորեղս,
Մեծս, անպարտս,
Դու իմ եզակիս,
Մեկս, մի հատս,
Ինձ համար քո թեժ
Ծփանքների տակ
Միայն մեռնելու
Ահն էր արգելված...
Դատարկելու եմ
Վերջին գավաթս
Իմ կարմիր, կարմիր
Հավատի կենաց։